Ўзбекистон Афғонистонга қарийб 400 тонна гуманитар ёрдам юборди
Ушбу гуманитар акция 2025 йил давомида Афғонистонга юборилган тўртинчи ёрдам партияси ҳисобланади.
2025 йил 29 декабрь куни Афғонистоннинг Балх вилояти Ҳайратон шаҳрида Ўзбекистон Республикаси раҳбарияти номидан афғон халқига навбатдаги гуманитар ёрдам партиясини топшириш маросими бўлиб ўтди. Бу ҳақда Ташқи ишлар вазирлиги хабар берди.
Умумий оғирлиги қарийб 390 тоннани ташкил этган ушбу юк Термиз юк ташиш марказида шакллантирилган бўлиб, озиқ-овқат маҳсулотлари, дори-дармонлар ҳамда тиббий жиҳозлардан иборат.
Гуманитар ёрдам билан танишар экан, Балх вилояти ҳокими М. Вафо Ўзбекистон Президенти номига афғон халқини доимий қўллаб-қувватлаб келаётгани ва кўрсатилаётган ғамхўрлик учун самимий миннатдорчилик билдирди. Унинг таъкидлашича, мазкур ташаббус Ўзбекистон раҳбариятининг афғон халқи билан чинакам биродарлик ва яқин қўшничилик муносабатларига содиқлигини яна бир бор тасдиқлайди.
Қайд этилишича, ушбу гуманитар акция 2025 йил давомида Афғонистон халқига юборилган тўртинчи ёрдам партияси ҳисобланади.
Шунингдек, вилоят раҳбари Ўзбекистоннинг икки томонлама муносабатларни мустаҳкамлаш, савдо-иқтисодий ҳамкорликни ривожлантириш йўлидаги изчил саъй-ҳаракатларини алоҳида эътироф этди. Ушбу чоралар натижасида сўнгги йилларда Афғонистон экспорти ҳажми ошиб, аҳолининг ижтимоий-иқтисодий аҳволи ва фаровонлиги яхшиланиб бораётгани таъкидланди.
