Президент Янги Тошкентда янги кўприк ва метро инфратузилмаси қурилишини кўздан кечирди
Чирчиқ дарёси устидан барпо этилаётган кўприк ва метро билан интеграциялашган автотураргоҳ шаҳар транспортини енгиллаштиради.
Президент Шавкат Мирзиёев Янги Тошкент ҳудудида олиб борилаётган бунёдкорлик ишлари доирасида Чирчиқ дарёси устидан қурилаётган янги кўприк ҳамда метро бекати билан бирлаштирилган автотураргоҳ лойиҳаси билан танишди. Мазкур объектлар пойтахт ва Янги Тошкент ўртасидаги транспорт алоқаларини мустаҳкамлашга хизмат қилади.
Маълумотларга кўра, янги кўприк бир суткада 40–50 мингта автотранспорт воситасини ўтказиш қувватига эга бўлади. Қурилиш ишлари жорий йил охирида бошланган бўлиб, ҳозирда дастлабки босқич амалга оширилмоқда. Лойиҳа транспорт оқимини самарали бошқариш ва ҳаракат хавфсизлигини оширишга қаратилган.
Қурилиш жараёнида атроф-муҳитни муҳофаза қилиш масаласига алоҳида эътибор қаратилмоқда. Соҳил ҳудудлари кўкаламзорлаштирилади, энергия тежамкор ёритиш тизимлари ўрнатилади, пиёдалар ва велосипед йўлаклари барпо этилади. Шунингдек, кўприк орқали икки тасмали трамвай йўли ўтказилиши режалаштирилган.
Президент бўлажак метро линиясининг автотураргоҳ билан интеграциялашган бекати қурилиши билан ҳам танишди. 21 километр узунликдаги янги метро линияси 9 та бекатдан иборат бўлиб, кунига 230 минг йўловчига хизмат кўрсатади. Давлат раҳбари лойиҳаларнинг стратегик аҳамиятини таъкидлаб, қурилиш ишларини белгиланган муддатда ва юқори сифатда якунлаш бўйича тавсиялар берди.
