Президент Янги Тошкентдаги йирик қурилиш лойиҳалари тақдимоти билан танишди
Лойиҳа тўлиқ якунлангач, Янги Тошкент 2 миллион нафар аҳоли истиқомат қиладиган йирик мегаполисга айланиши режалаштирилган.
Президент Шавкат Мирзиёев Янги Тошкент шаҳрини барпо этиш дирекциясига ташриф буюриб, ҳудудда амалга оширилаётган ҳамда истиқболдаги йирик қурилиш лойиҳалари тақдимоти билан танишди. Давлатимиз раҳбарига шаҳар қурилишининг бугунги ҳолати, босқичлари ва келгусидаги режалар юзасидан батафсил ахборот берилди.
Маълум қилинишича, Янги Тошкент қурилишига 2023 йилда тамал тоши қўйилган бўлиб, лойиҳа учун Юқори ва Ўрта Чирчиқ туманларидан 19 минг 700 гектар ер майдони ажратилган. Концепция Буюк Британиянинг “Сросс Воркс” компанияси томонидан ишлаб чиқилган. Ҳозирда ҳудудда 100 дан ортиқ лойиҳа жадал амалга оширилмоқда, 2025 йил якунига келиб қурилиш майдонлари 3 миллион квадрат метрга етган.
Биринчи босқичда 6 минг гектар ҳудудда ишлар олиб борилиб, 600 минг аҳоли учун замонавий яшаш муҳити яратилади. Лойиҳа тўлиқ якунлангач, Янги Тошкент 2 миллион нафар аҳоли истиқомат қиладиган йирик мегаполисга айланиши режалаштирилган. Шу билан бирга, ер ости муҳандислик тармоқлари, туннель ва автотураргоҳлар қурилиши, транспорт қатновини енгиллаштиришга хизмат қилиши таъкидланди.
Президент шаҳарсозликда «яшил» тамойилларга устувор аҳамият бериш, жамоат транспорти, пиёда ва велосипедчилар учун қулай шароитлар яратиш зарурлигини қайд этди. Инвесторлар фаоллиги ҳам юқори бўлиб, ҳозиргача 2 миллиард долларлик инвестиция шартномалари имзоланган. Давлатимиз раҳбари барча лойиҳалар замонавийлик билан бирга халқ манфаатига хизмат қилиши лозимлигини алоҳида таъкидлади.
