Қўқонлик табиб озодликка чиқиб, айбловларни инкор этди

 

 

Аввалроқ Қўқонлик табиб Иқболжон Солиевнинг гувоҳномаси муддати тугаганига қарамай, ноқонуний фаолият юритгани аниқлангани сабабли суд қарори билан унга 10 сутка маъмурий қамоқ жазоси қўлланганди. Куни кеча у озодликка чиқиб, ижтимоий тармоқлардаги саҳифалари орқали ўзи ҳақидаги айбловларга муносабат билдирди.

 

Табиб 2024 йилдан буён ҳужжатларсиз ишлагани ҳақидаги хабарларни мутлақо ёлғон деб атади. Унинг сўзларига кўра, Ўзбекистон халқ табобати ассоциацияси томонидан 2025 йилгача амал қилувчи гувоҳнома, Қозоғистон соғлиқни сақлаш ташкилоти ҳужжати ҳамда халқаро сертификат мавжуд. Шунингдек, у муддат кўрсатилмаган, доимий гувоҳномага ҳам эгалигини таъкидлади.

 

Иқболжон Солиевнинг адвокати Абдуллажон Жўраев ҳам айрим ахборотлар нотўғри ва асоссиз тарқатилганини билдириб, табибнинг гувоҳномаси муддати ўтмаганини қайд этди. У Маъмурий жавобгарлик тўғрисидаги кодекснинг 59-5-моддаси бўйича билдирилган эътирозларга изоҳ берар экан, табиб фаолиятини оммавий тарғибот сифатида баҳолаш нотўғри эканини айтди.

 

Шунингдек, табибнинг ўзи табобат фаолияти учун лицензия талаб этилмаслигини, бу касб авлоддан авлодга ўтиб келаётганини таъкидлади. Маълумот ўрнида, Иқболжон Солиев 2025 йил 10 январь куни Қўқон шаҳар суди қарори билан МЖтКнинг 59-5-моддаси 1-қисми асосида айбдор деб топилиб, базавий ҳисоблаш миқдорининг 20 баравари миқдорида жаримага тортилган.