Қозоғистонда Нурсултон Назарбоевнинг чет элга чиқишини чеклаш таклиф этилди
Таклиф собиқ президентнинг яқинда Москвада Владимир Путин билан бўлиб ўтган учрашуви фонида илгари сурилди.
Қозоғистон Мажлиси депутати Ермурат Бапи давлат сирларига кириш ҳуқуқига эга бўлган собиқ юқори лавозимли амалдорларнинг, жумладан, мамлакатнинг биринчи президенти Нурсултон Назарбоевнинг чет элга чиқишларини қонуний жиҳатдан чеклашни таклиф қилди. Бу ҳақда Orda.kz нашри хабар бермоқда.
Депутат мазкур ташаббусни миллий хавфсизликни таъминлаш зарурати билан изоҳлади. Унинг таъкидлашича, собиқ президентлар, вазирлар ва бошқа юқори мартабали амалдорлар хизмат фаолияти давомида давлат сирларига эга бўлган ва бу маълумотлар мамлакат хавфсизлиги учун ҳануз муҳим аҳамият касб этади.
Ермурат Бапи ушбу таклифни Нурсултон Назарбоевнинг яқинда Россия пойтахти Москвада Владимир Путин билан бўлиб ўтган учрашуви фонида илгари сурган.
Депутатнинг фикрича, бундай ташрифлар айрим ҳолатларда Қозоғистон миллий хавфсизлигига таҳдид сифатида баҳоланиши мумкин.
У давлат сирларига эга бўлган шахсларнинг чет элга сафарларини тартибга солувчи алоҳида қонун зарурлигини таъкидлаб, халқаро тажрибани, хусусан, Хитойда амалда бўлган чекловларни мисол сифатида келтирди.
Депутат, шунингдек, Нурсултон Назарбоев ва собиқ Бош прокурор Қайрат Кожамжаров каби шахслар учун олдиндан “чегара назорати” ёки “хавф индикатори” жорий этишни таклиф қилди. Унинг айтишича, собиқ президентнинг Москвага сафари айрим доираларда давлат идоралари ва жамиятга нисбатан сиёсий босим сифатида қабул қилиниши мумкин.
Журналистларнинг саволларига жавоб берар экан, Ермурат Бапи ҳозирги шароитда ушбу ташрифдан мамлакат учун ҳеч қандай сиёсий фойда кўрмаётганини билдирган.
“Ўз мамлакатида, ўз халқи орасидан таянч топа олмаган инсонига ачинаман. Энди у чет элдан таянч излашга мажбур. Бу собиқ президент учун фожиа”, — деди депутат.
