Талабалар учун контракт тўловлари ва қабул муддатлари узайтирилди
2025/2026-ўқув йили учун тўловларни амалга ошириш ва ўқишга қабул қилиш 31 январгача давом этади.
Давлат комиссиясининг қарорига мувофиқ, 2025/2026-ўқув йилида олий таълим муассасаларининг бакалавриат ва магистратура босқичларига тавсия этилган талабалар учун муҳим енгиллик жорий этилди. Контракт тўловларини амалга ошириш ва талабалар сафига қабулни расмийлаштириш муддати 2026 йил 31 январга қадар узайтирилди.
Ушбу қарор қабул параметрлари доирасида ўқишга тавсия этилган абитуриентларга тааллуқли бўлиб, улар базавий тўлов-контракт шаклида бир йиллик ўқитиш қийматининг камида 50 фоизини тўлаши лозим. Бу талаб ўқишга қабул жараёнини якунлаш учун асосий шарт ҳисобланади.
Шунингдек, табақалаштирилган тўлов-контракт (супер-контракт) асосида таҳсил олишни истаган абитуриентлар ҳам белгиланган бир йиллик ўқитиш қийматининг камида 50 фоизини белгиланган муддатгача тўлаб беришлари зарур.
Масъуллар таъкидлашича, муддатнинг узайтирилиши талабалар ва уларнинг ота-оналарига молиявий масалаларни янада қулай шароитда ҳал этиш имконини беради. Шу билан бирга, абитуриентлардан белгиланган талаб ва муддатларга қатъий риоя қилиш сўралмоқда.
