Сўнгги 5 йилда Ўзбекистон энергетикаси кескин ривожланди

 

Сўнгги беш йил ичида Ўзбекистон энергетика соҳасида туб бурилиш даврини бошдан кечирди. Инвестициялар ҳажми 2021 йилдаги 2,6 млрд доллардан 2025 йилда 11 млрд долларга етиб, қарийб 4 баробар ошди. Бу жараён энергетика инфратузилмасини янгилаш ва барқарор ривожланишни таъминлашга хизмат қилди.

 

Бугунги кунда мамлакатдаги жами электр энергияси генерация қувватлари 25,8 ГВтни ташкил этади. Шундан 5,6 ГВт қуёш ва шамол электр станциялари ҳиссасига тўғри келади. Гидроэлектр станциялар қуввати 2,4 ГВт, иссиқлик электр станциялари эса 17,8 ГВтни ташкил қилиб, энергетика балансида муҳим ўрин тутмоқда.

 

Электр энергияси ишлаб чиқариш ҳажми ҳам барқарор ўсмоқда. Агар 2017 йилда 60 млрд кВт·соат электр энергияси ишлаб чиқарилган бўлса, 2025 йил 30 декабрь ҳолатига бу кўрсаткич 86,4 млрд кВт·соатга етди. Натижада ишлаб чиқариш ҳажми қарийб 40 фоизга ошди.

 

Электр тармоқлари инфратузилмасини ривожлантириш борасида ҳам сезиларли ишлар амалга оширилди. 1991–2016 йилларда 9 300 км электр узатиш тармоқлари ва 4 800 та трансформатор пункти қурилган бўлса, 2021–2025 йилларда бу кўрсаткич 69 минг км тармоқ ва 14 мингта трансформатор пунктига етди. Режаларга кўра, 2026–2030 йилларда яна 45 минг км электр узатиш тармоқлари, 43 та подстанция ва 9,7 мингта трансформатор пункти барпо этилади. Шу билан бирга, 2025 йилда «яшил» энергия улуши 30 фоизга етди, 2030 йилга бориб эса уни 54 фоизга етказиш кўзда тутилган.