2026 йилдан такси ҳайдовчилари солиқларни қандай тўлайди?

2026 йил 1 январдан бошлаб Ўзбекистонда ўзини ўзи банд қилган такси ҳайдовчилари учун солиқ тизими соддалаштирилади. Улар учун айланмадан олинадиган солиқнинг камайтирилган — 1 фоизлик ставкаси жорий этилади.

 

Янги тартибга кўра, солиқ фақат ҳайдовчининг реал даромади асосида ҳисобланади. Масалан, агар такси ҳайдовчиси бир ойда 2 миллион сўм даромад қилса, тўланадиган солиқ миқдори атиги 20 минг сўмни ташкил этади.

 

Агар йўловчилар онлайн такси агрегаторлари орқали ташилган бўлса, солиқ автоматик тарзда ундирилади. Бунда агрегатор платформа ҳайдовчининг даромадидан 1 фоизни ушлаб қолиб, уни тўғридан тўғри давлат бюджетига ўтказади. Ушбу механизм фақат агрегатор орқали олинган даромадларга татбиқ этилади. Платформадан ташқарида амалга оширилган ташувлардан олинган маблағлар автоматик солиқ ҳисобига киритилмайди.

 

Шунингдек, электрон тўловларни қабул қилиш учун QR-код ўрнатиш масаласига ҳам аниқлик киритилди. Амалдаги тартибга кўра, 2026 йилдан бошлаб якка тартибдаги тадбиркорлар ва ўзини ўзи банд қилган шахслар учун QR-коддан фойдаланиш мажбурий этиб белгиланган. Бироқ такси ҳайдовчилари учун бу талаб истисно тариқасида қўлланилмайди.

 

Хусусан, 2025 йил 12 августдаги 247-сонли қарорга мувофиқ, солиқ органларининг ахборот тизимлари билан интеграциялашган онлайн агрегаторлар орқали йўловчи ташиш ва етказиб бериш хизматларини кўрсатувчи ҳайдовчилар ва курьерлардан алоҳида QR-код ўрнатиш талаб этилмайди.