Нью-Йорк тарихида илк бор мэр Қуръон билан қасамёд қилади

 

Нью-Йорк шаҳри тарихида илк бор янги сайланган мэр Қуръон билан қасамёд қилади.

 

Сайловларда ғалаба қозонган Зоҳран Мамдани 2026 йил 1 январь куни расман ўз лавозимига киришади. Бу ҳақда Ассосиатед Пресс хабар берди.

 

Қайд этилишича, Мамданидан аввалги мерларнинг аксарияти лавозимга киришиш чоғида Инжил билан қасамёд қилган. АҚШ федерал қонунчилиги ҳамда штат ва шаҳар конституцияларига кўра, қасамёд маросимида диний китобдан фойдаланиш мажбурий ҳисобланмайди.

 

Сайловолди кампанияси давомида Зоҳран Мамдани асосан яшаш харажатларининг юқорилиги масаласига эътибор қаратган. Шу билан бирга, у ўзининг мусулмон эътиқодини очиқ намоён этиб келган.

 

Хусусан, шаҳар бўйлаб беш тумандаги масжидларга ташриф буюриб, илк бор овоз бераётган жанубий осиёлик ва мусулмон сайловчиларни фаол равишда сафарбар этишга эришган.

 

Сайловлардан сўнг одатга кўра ўтиш даври жамоаси шакллантирилиши кутилмоқда.

 

Икки ойдан кам вақт ичида бюджети қарийб 120 миллиард долларни ташкил этувчи ва 8,5 миллионга яқин аҳоли истиқомат қиладиган шаҳар бошқаруви мусулмон мер назоратига ўтади.

 

АҚШ ОАВларига кўра, мамлакатнинг собиқ президенти Барак Обама Мамданига қўнғироқ қилиб, уни ғалаба билан табриклаган ва қўллаб-қувватлаган.

 

Зоҳран Мамдани Угандада туғилган бўлгани сабабли АҚШ президенти лавозимига номзод бўла олмайди. У ўзини “демократик социалист” сифатида таърифлаб, арзон озиқ-овқат дўконларини ташкил этиш, айрим уй-жойлар бўйича ижара тўловларини музлатиш ҳамда автобус йўл ҳақини бекор қилиш ташаббусларини илгари сурмоқда.

 

Шаҳар сайлов комиссияси маълумотига кўра, сайловчиларнинг иштироки 1969 йилдан бери илк бор 2 миллион кишидан ошган.