Ўзбекистонда электромобилларни зарядлаш ускуналари божхона тўловларидан озод қилинди

Ўзбекистонда электромобиллар инфратузилмасини ривожлантириш ҳамда айрим тармоқларни қўллаб-қувватлаш мақсадида қатор божхона ва солиқ имтиёзлари жорий этилди.

 

Президент Шавкат Мирзиёев томонидан имзоланган тегишли фармон ҳақида Адлия вазирлиги маълумот берди.

 

Фармонга мувофиқ, 2026 йил 1 январдан 2028 йил 1 январгача Ўзбекистон ҳудудига олиб кириладиган айрим товарлар божхона тўловларидан озод этилади. Хусусан, электр транспорт воситалари, уларнинг компонентлари ҳамда уларга хизмат кўрсатиш инфратузилмаси учун мўлжалланган зарядлаш станциялари ушбу имтиёздан фойдаланади.

 

Шунингдек, ипакчилик соҳасини ривожлантиришни қўллаб-қувватлаш мақсадида ипак ишлаб чиқаришда фойдаланиладиган йиғириш ва тўқиш дастгоҳлари учун эҳтиёт қисмлар, тут уруғлари ва кўчатлари, шунингдек супер-элит, элита ва саноат ипак қурти зотлари ҳам божхона тўловларидан озод қилинади.

 

Бундан ташқари, чиқиндиларни бошқариш соҳасида фаолият юритаётган ташкилотлар учун солиқ имтиёзлари жорий этилади.

 

Мазкур имтиёзлар 2026 йил 1 январдан 2031 йил 1 январгача амал қилади. Унга кўра, чиқиндиларни йиғиш, олиб чиқиш, саралаш ва қайта ишлаш билан шуғулланувчи компаниялар даромад солиғи ҳамда ижтимоий солиқни 1 фоиз миқдорида тўлайди.

 

Солиқ имтиёзларидан фойдаланиш учун корхоналарнинг чиқиндиларни бошқариш фаолиятидан олинган даромади ҳисобот даврида умумий даромаднинг камида 90 фоизини ташкил этиши, шунингдек, барча ходимларнинг ойлик иш ҳақи энг кам иш ҳақининг камида икки бараваридан кам бўлмаслиги лозим.