Россияда 2027 йилгача мигрантларни кузатиш бўйича янги тизим жорий этилади

Россия ҳукумати 2027 йил охирига қадар мамлакат ҳудудида мигрантлар ҳаракати устидан назоратни кучайтиришга қаратилган комплекс чораларни амалга оширади. Бу ҳақда ТАСС томонидан кўриб чиқилган Россия Федерациясининг миграция сиёсати бўйича режасида маълум қилинди.

 

Ҳужжатга кўра, хорижий фуқароларнинг Россия ҳудуди бўйлаб ҳаракатини мониторинг қилишга мўлжалланган махсус ахборот тизими 2027 йил 10 декабрга қадар ишга туширилади.

 

Мазкур лойиҳа Ички ишлар вазирлиги, Федерал хавфсизлик хизмати, Транспорт вазирлиги ва Рақамли ривожланиш вазирлиги томонидан Россия ҳудудлари билан ҳамкорликда амалга оширилади.

 

Шу билан бирга, 2026 йил декабрига қадар чет элликларни биометрик идентификациялаш учун алоҳида ахборот тизимини яратиш режалаштирилган. Ушбу тизим хорижий фуқароларнинг шахсини аниқлаш ва миграция жараёнларини назорат қилиш самарадорлигини оширишга хизмат қилади.

 

Режага мувофиқ, Россия Ички ишлар вазирлиги халқаро авиачипталарни брон қилиш тизимларидан фойдаланиш имкониятига эга бўлади. Бу чоралар Россияга кириши тақиқланган хорижий фуқаролар ҳақида олдиндан ахборот олиш ва чегарадаги назоратни кучайтириш мақсадида жорий этилади.

 

Бундан ташқари, вазирлик томонидан очиқ манбалардаги маълумотларни таҳлил қилишга мўлжалланган махсус ахборот тизимини яратиш ҳам кўзда тутилган.