Сирдарёда ЙПХ ходими 38 ёшли аёлни уриб юборди
Ҳодиса оқибатида аёл вафот этди.
Сирдарё вилоятида йўл-транспорт ҳодисаси оқибатида аёл киши вафот этди. Ҳодиса 31 декабрь куни эрта тонгда Гулистон шаҳрининг “Янгибозор” маҳалласи ҳудудида содир бўлган. Бу ҳақда Qalampir.uz маълум қилди.
Дастлабки маълумотларга кўра, соат тахминан 06:30 атрофида йўлни кесиб ўтаётган 1987 йилда туғилган аёл йўл-патрул хизмати ходими бошқарувидаги автомобиль томонидан уриб юборилган. Зарба кучли бўлгани сабабли жабрланувчи оғир тан жароҳатлари олган.
Марҳума соат 06:55 да клиник ўлим ҳолатида тиббиёт муассасасига олиб борилган. Шифокорлар томонидан барча зарур реанимацион чоралар кўрилганига қарамай, соат 07:50 да биологик ўлим қайд этилган.
Тиббий хулосага кўра, жабрланувчига очиқ бош мия жароҳати, мияга қон қуйилиши гумони, суяклар синиши, ички қон кетиш ҳамда ҳаёт билан номутаносиб кўплаб тан жароҳатлари ташхиси қўйилган.
Маълум қилинишича, вафот этган аёл уч нафар фарзанднинг онаси бўлган.
Эслатиб ўтамиз, аввалроқ Тошкент вилоятининг Бекобод туманида ИИБ ходими уриб кетиб, унинг жасадини Сирдарё дарёсига ташлаб юборгани хабар қилинган эди. Айни пайтга қадар марҳумнинг жасади топилгани йўқ.
