Фарғоналик ўқувчи сунъий интеллект бўйича дунёдаги илк университетга тўлиқ грант асосида қабул қилинди
Президент мактаби битирувчиси Отабек Комилов MBZUAI университетида йилига 45 минг долларлик грант асосида таҳсил олади.
Фарғона шаҳридаги Президент мактабининг 11-синф ўқувчиси Отабек Комилов сунъий интеллектга ихтисослашган дунёдаги биринчи университет — Mohammed Bin Zayed University of Artificial Intelligence (MBZUAI) га тўлиқ грант асосида қабул қилинди. Бу ҳақда Иқтисослаштирилган таълим муассасалари агентлиги маълум қилди.
Талабага ажратилган грант миқдори йилига 45 минг АҚШ долларини ташкил этиб, 4 йиллик таълим давомида жами 180 минг долларга тенг. MBZUAI университети QS халқаро рейтингига кўра сунъий интеллект йўналишида дунёнинг Top-10 олий таълим муассасалари қаторига киради ва AI бўйича етакчи илмий марказлардан бири ҳисобланади.
Отабек Комиловнинг ютуқлари орасида IELTS имтиҳонидан 7 балл, Америка математика олимпиадаси (AMC) миллий босқичида олтин медаль, Жануби-Шарқий Осиё математика олимпиадаси (SEAMO) миллий босқичида олтин медаль ҳамда V2E номли сунъий интеллект лойиҳасига асос солгани бор. Ушбу муваффақият Президент мактаблари ўқувчиларининг халқаро миқёсда юқори билим ва рақобатбардош салоҳиятга эга эканини яна бир бор намоён этди.
