Қўқонда Янги йил кечасида мушакбозлик уюштирган шахслар 15 суткага қамалди
Йўл қатнов қисмида қўлда ясалган пиротехника воситаларини ёққан 10–15 нафар фуқаро маъмурий жавобгарликка тортилди.
Жорий йил 1 январга ўтар кечаси Фарғона вилоятининг Қўқон шаҳрида Янги йилни ноқонуний тарзда нишонлаб, мушакбозлик уюштирган шахслар 15 суткага маъмурий қамоққа олинди. Бу ҳақда вилоят Ички ишлар бошқармаси расмий маълумот берди.
Қайд этилишича, 31 декабрь куни соат 23:55 атрофида Қўқон шаҳар А. Чархий кўчасида шу ҳудудда яшовчи фуқаролар йўлнинг қатнов қисмига чиқиб, пиротехника воситаларини ёқмоқчи бўлган. Тахминан 10–15 нафар шахс томонидан Ўзбекистон туманининг Оҳунқайнар қишлоғида қўлда тайёрланган пиротехника буюмлари ишлатилгани аниқланган.
Тезкор суриштирувлар натижасида ҳуқуқбузарларнинг шахси аниқланиб, уларга нисбатан Маъмурий жавобгарлик тўғрисидаги кодекснинг 183-моддаси (майда безорилик) ва 185¹-моддаси (пиротеҳника буюмларининг қонунга хилоф муомаласи) билан ҳужжатлар расмийлаштирилган ҳамда иш судга оширилган.
Суд қарорига кўра, ҳар бир ҳуқуқбузарга 15 сутка маъмурий қамоқ жазоси ва базавий ҳисоблаш миқдорининг 30 баравари миқдорида жарима тайинланган. Аввалроқ ижтимоий тармоқларда Қўқонда оммавий тартибсизлик ва автомобиль ёқиб юборилгани ҳақида хабарлар тарқалган эди, бироқ вилоят ИИБ бу маълумотларни рад этган.
