“Вазифам ҳақиқатни етказиш ва назорат қилиш” Саида Мирзиёева Администрация раҳбари лавозимига қўйилгани ҳақида гапирди

 

 

 

Президент Администрацияси раҳбари Саида Мирзиёева Альтер Эго лойиҳасига берган интервьюсида ўзининг ушбу лавозимга тайинланишини президентга ҳудудлардан реал ва ишончли маълумот етказиш зарурати билан изоҳлади. Унинг айтишича, Администрация стратегиялар ишлаб чиқади ва ижро аппаратига йўналиш беради, амалий ишлар эса Вазирлар Маҳкамаси зиммасига юклатилган. Кўзга кўринмайдиган бу жараён ортида катта жамоа, таҳлил, маслаҳат ва стратегик қарорлар туради. Бундан ташқари у давлатнинг ташқи имкониятлари чекланганини ҳам айтиб ўтди. Ўзбекистоннинг жойлашув жиҳатидан денгизга яқин эмаслиги бунга мисол бўла олади. Бундай ресурсларни ўрнини тўлдириш учун эса, албатта катта-катта маблағ кераклиги таъкидланди.

Саида Мирзиёева Шавкат Мирзиёев президентликка келгач, мамлакатни очиқлик ва ислоҳотлар сари етаклаганини таъкидлади. У болалар меҳнатига барҳам бериш, валюта либераллашуви каби қарорлар жиддий қаршиликларга қарамай амалга оширилганини қайд этди. Давлат раҳбари тизимни ичидан билган ҳолда, уни кескин инкор этмасдан, босқичма-босқич ўзгартириш йўлини танлаган.

Ўз вазифасини “ҳақиқатни етказиш ва назорат қилиш” деб таърифлаган Саида Мирзиёева президент учун энг муҳим мақсад — ҳар бир ўзбекистонлик ҳаётини яхшилаш эканини айтди. Унинг сўзларига кўра, Администрация айнан шу ғоя билан ишлайди. “Биз бу ерда вақтинчамиз, аммо шу вақт ичида одамлар ҳаётини яхшироқ қилишга хизмат қилишимиз керак”, — деди у.