Амирсой ва Билдирсойга олиб борувчи йўлда бир томонлама ҳаракат ташкил этилди
Байрам кунлари тирбандлик ва йўл-транспорт ҳодисаларининг олдини олиш мақсадида Бўстонлиқнинг тоғли ҳудудларида ҳаракат тартиби ўзгартирилди.
Тошкент вилоятидаги машҳур дам олиш масканлари — Амирсой, Чимён ва Билдирсойга олиб борувчи автомобиль йўлида бир томонлама ҳаракат ташкил этилди. Бу ҳақда Йўл ҳаракати хавфсизлиги хизмати маълум қилди. Қарор байрам кунлари ушбу ҳудудларга ташриф буюрувчилар сони кескин ошиши билан боғлиқ.
Маълум қилинишича, чора-тадбирлар жамоат тартибини сақлаш, йўлларда ҳаракат хавфсизлигини таъминлаш, шунингдек, йўл-транспорт ҳодисалари ва тирбандликларнинг олдини олиш мақсадида жорий этилган. Тоғли ҳудудларда транспорт оқими кўпайиши сабабли ҳаракатни тартибга солиш зарурати юзага келган.
Хусусан, 4Р6 Тошкент—Чирчиқ—Чимён автомобиль йўлининг 57-километридан 92-километригача, яъни 4Р10 автомобиль йўли билан туташ жойига қадар бўлган қисмда транспорт воситалари ҳаракати бир томонлама этиб белгиланди. Ҳайдовчилардан вақтинчалик чекловларга амал қилиш ва йўл белгиларига эътиборли бўлиш сўралмоқда.
