АҚШ Венесуэлага қарши ҳужум бошлади

Бугун, 3 январь куни АҚШ томонидан Венесуэла ҳудудига авиа зарбалар берилгани ҳақида хабарлар тарқалди. Reuters агентлиги ва маҳаллий манбаларга кўра, Венесуэла пойтахти Каракас шаҳрида бир неча кучли портлаш овозлари эшитилган, осмонда тутун кузатилган ҳамда ҳаво ҳужумидан мудофаа тизимлари ишга туширилган.

 

Маҳаллий аҳолининг билдиришича, зарбалар асосан Каракаснинг жанубий қисмига тўғри келган. Хусусан, Форт-Тиюна ҳарбий ҳудуди ва генералиссимус Франсиско де Миранда номидаги авиабаза яқинида портлашлар қайд этилган.

 

Дастлабки маълумотларга кўра, пойтахт ҳудудида камида ўнга яқин ҳарбий ва стратегик объектлар нишонга олинган.

 

Шунингдек, мамлакат шимолида жойлашган Варгас штатидаги Ла-Гуайра ҳарбий-денгиз базаси ҳам зарбага учрагани ҳақида хабарлар мавжуд. Гувоҳларнинг сўзларига кўра, Каракас осмонида АҚШга тегишли вертолётлар, жумладан “Chinook” туридаги оғир юк ташувчи десант вертолётлари ҳаракати кузатилган.

 

Бунга жавобан Венесуэла Ҳарбий-ҳаво кучлари ҳаво ҳужуми хавфини эълон қилган ва Су-30МКВ қирувчи самолётларини фавқулодда тарзда ҳавога кўтарган. Улар мамлакат ҳаво ҳудудини ҳимоя қилиш ва эҳтимолий таҳдидларни тўхтатиш учун йўналтирилгани айтиламоқда.

 

Мазкур ҳолатлар Вашингтоннинг сўнгги ойларда Венесуэлага нисбатан босимни кучайтириши фонида юз бераётгани қайд этилмоқда. АҚШ маъмурияти аввалроқ Николас Мадуро ҳукуматига қарши санкцияларни кенгайтириш, минтақадаги ҳарбий иштирокни ошириш ҳамда наркотрафикка қарши операцияларни фаоллаштириш ниятини билдирган эди.

 

Каракасдаги портлашлар ортидан айрим туманларда электр таъминоти узилгани ва аҳоли ўртасида хавотир кучайгани хабар қилинмоқда. Расмий Каракас ҳозирча қурбонлар ёки етказилган зарар кўлами бўйича аниқ маълумот бермади.