“АҚШ Венесуэлани бошқаради” — Трамп
Трамп Иккинчи жаҳон урушидан буён бундай миқёсдаги муваффақиятли операция бўлмаганини айтди.
АҚШ президенти Доналд Трамп Венесуэла президенти Николас Мадурони ҳокимиятдан ағдариш мақсадида ўтказилган махсус ҳарбий операция юзасидан матбуот анжумани ўтказди. Sky News хабарига кўра, Трамп операцияни “мисли кўрилмаган муваффақият” деб атаб, АҚШ қуролли кучлари Каракасда тўлиқ назоратни қўлга олганини маълум қилди.
Трампнинг сўзларига кўра, Николас Мадуро тонгга яқин қўлга олинган. “Биз Мадурони зулматда қўлга олдик. Каракасда электр таъминоти ўчирилган эди. У ва унинг рафиқаси Америка адолати билан юзлашади”, деди АҚШ президенти. Унинг таъкидлашича, операция олдиндан пухта режалаштирилган ва деярли хатосиз амалга оширилган.
Трамп ушбу ҳарбий амалиётни “Ярим тун болғаси” деб атаб, Иккинчи жаҳон урушида́н буён бундай миқёсдаги муваффақиятли операция бўлмаганини айтди. “Ҳокимият хавфсиз, муносиб ва оқилона тарзда янги раҳбариятга топширилгунга қадар АҚШ Венесуэлани бошқаради”, дея кескин баёнот берди у.
