АҚШнинг Венесуэлага ҳужумлари дунё миқёсида кескин норозилик уйғотди
Россия ва Беларус АҚШ ҳаракатларини қуролли тажовуз деб баҳолади.
3 январь куни АҚШ томонидан Венесуэла ҳудудидаги ҳукумат ва ҳарбий объектларга авиазарбалар берилгани, шунингдек, мамлакат президенти Николас Мадуронинг қўлга олиниб, Венесуэладан олиб чиқилгани ҳақидаги баёнот халқаро майдонда кенг резонанс келтириб чиқарди. Турли давлатлар ва халқаро тузилмалар ушбу воқеаларга нисбатан ўз позицияларини билдирди.
Россия Ташқи ишлар вазирлиги АҚШнинг Венесуэлага қарши ҳаракатларини қуролли тажовуз сифатида баҳолаб, уларни кескин қоралади. Москва бундай амалларни оқлаш учун келтирилаётган сабабларни асоссиз, деб атади ҳамда халқаро ҳуқуқ ва давлатлар ўртасидаги ишончга путур етказилаётганини таъкидлади.
Европа Иттифоқининг ташқи сиёсат бўйича олий вакили Кажа Каллас ЙИ Венесуэладаги вазиятни диққат билан кузатаётганини билдирди.
Унинг сўзларига кўра, Европа Иттифоқи тинч сиёсий ўтишни қўллаб-қувватлайди, бироқ ҳар қандай шароитда халқаро ҳуқуқ ва БМТ Низоми тамойилларига риоя қилиниши зарур. Шунингдек, у минтақада ЙИ фуқароларининг хавфсизлиги устувор аҳамиятга эга эканини қайд этди.
Беларус президенти матбуот котиби Наталя Эисмонт Александр Лукашенко АҚШнинг Венесуэлага қарши ҳаракатларини қатъий қоралаганини маълум қилди. Унинг айтишича, Беларус раҳбари бундай ҳаракатлар АҚШ учун жиддий ва узоқ муддатли оқибатларга олиб келиши мумкинлиги ҳақида аввал ҳам огоҳлантирган.
Колумбия президенти Густаво Петро Венесуэла ва Лотин Америкаси суверенитетига қарши ҳар қандай тажовузни қоралаб, низолар фақат тинч йўл ва миллий мулоқот орқали ҳал этилиши лозимлигини таъкидлади. У халқаро муносабатларда халқларнинг ўз тақдирини ўзи белгилаш тамойили устувор бўлиши кераклигини қайд этди.
Куба президенти Мигел Диас-Канел эса АҚШнинг Венесуэлага қарши ҳаракатларини “жиноятчи ҳужум” деб баҳолаб, халқаро ҳамжамиятни зудлик билан муносабат билдиришга чақирди. У Кариб ва Лотин Америкаси минтақасида зўравонликнинг кучайишини кескин танқид қилди.
