Эрон бўйлаб норозилик намойишлари кучаймоқда: қурбонлар бор
Иқтисодий инқироз сабаб бошланган намойишлар сиёсий тус олмоқда.
Al Jazeera хабарига кўра, Эронда давом этаётган норозилик намойишлари чоғида камида 6 киши ҳалок бўлган, 17 киши жароҳат олган. Намойишлар 28 декабрь куни Теҳронда савдо соҳаси вакиллари томонидан бошланган бўлиб, улар мамлакатдаги оғирлашиб бораётган иқтисодий вазиятга норозилик сифатида дўконларини ёпган. Орадан кўп ўтмай, норозилик акциялари бошқа йирик шаҳарларга ҳам ёйилди.
Вақт ўтиши билан иқтисодий талаблар сиёсий шиорларга алмашди. Намойишчилар «Озодлик» ва ҳукуматга қарши шиорларни айта бошлади. Айрим ҳудудларда норозиликлар хавфсизлик кучлари билан тўқнашувларга айланган. Маҳаллий ОАВларга кўра, полиция кўздан ёш оқизувчи газ қўллаган, айрим шаҳарларда эса интернет алоқаси чекланган. 1 январь куни Теҳронда камида 30 киши жамоат тартибини бузишда айбланиб ҳибсга олингани маълум қилинди.
Хабарларга кўра, норозиликлар Марказий ва Жанубий Эроннинг бир қатор шаҳарларида ҳам кузатилган. Айрим манбалар қурбонлар сони бундан кўпроқ бўлиши мумкинлигини билдирсада, ҳозирча бу маълумотлар расман тасдиқланмаган. Ҳукумат иқтисодий ислоҳотлар ва коррупцияга қарши чоралар кўришга ваъда бермоқда, бироқ вазият ҳануз таранглигича қолмоқда. Намойишлар қандай йўналишда давом этиши ҳозирча номаълум.
