Қозоғистонда мактаб ўқувчилари учун сунъий интеллект репетиторлари жорий этилади
200 мингдан ортиқ ўқитувчи сунъий интеллект бўйича тайёрланади.
Қозоғистон 2026–2027 йилларда таълим соҳасига сунъий интеллект (СИ) технологияларини кенг жорий этишни режалаштирмоқда. Бу ҳақда Tengrinews.kz нашри хабар берди.
Таълим вазири ўринбосарининг маълум қилишича, мамлакатда рақамли профилларнинг миллий тизими ҳамда Миллий таълим платформасини яратиш ишлари бошланган. Ушбу мақсадда Миллий таълим маълумотлар базаси модернизация қилиниб, электрон кундаликлар ва журналларни ўз ичига олган барча LMS тизимлари учун ягона маълумотлар омборига айлантирилади.
Хабарларга кўра, сунъий интеллект агентлари ўқитувчиларнинг кундалик иш юкини камайтиради, жумладан, педагогик кенгашлар ва ҳужжатларни тайёрлашда ёрдам беради.
2026/2027 ўқув йилидан бошлаб кичик мактаблар учун синов ҳудудларида “Қазақ Digital Mektebi” лойиҳаси ишга туширилади. Мазкур лойиҳа доирасида сунъий интеллект репетиторлари ҳам фаолият юритади. 2026 йилга келиб эса 200 мингдан ортиқ ўқитувчи амалий сунъий интеллект кўникмаларига эга бўлиши режалаштирилган.
Шунингдек, ўқувчилар орасида сунъий интеллект саводхонлигини ошириш масаласига алоҳида эътибор қаратилади.
Маълумот ўрнида, 2026 йил Қозоғистонда “Рақамлаштириш ва сунъий интеллект йили” деб эълон қилинган.
