Россия АҚШдан Мадуронинг ҳибсга олиниши бўйича изоҳ талаб қилди
Москва АҚШ ҳаракатларини суверенитетга тажовуз сифатида баҳолаши мумкинлигини билдирди.
Россия Ташқи ишлар вазирлиги АҚШдан Венесуэла президенти Николас Мадуро ва унинг рафиқаси Силия Флореснинг қўлга олиниши ҳақидаги маълумотлар юзасидан расмий тушунтириш беришни талаб қилмоқда. Бу ҳақда Россия ТИВ баёнотида маълум қилинди.
Вазирликда қайд этилишича, агар АҚШ томонидан Венесуэла ҳудудида президентни ҳибсга олиш ва мажбуран олиб чиқиб кетиш ҳолати тасдиқланса, бу мустақил давлат суверенитетига нисбатан қўпол тажовуз ҳамда халқаро ҳуқуқнинг асосий тамойилларини бузиш сифатида баҳоланади.
“Биз ушбу вазиятни зудлик билан аниқлаштиришга чақирамиз. Агар бу ҳаракатлар ҳақиқатан содир бўлган бўлса, улар қабул қилиб бўлмайдиган даражада жиддий қонунбузарлик ҳисобланади”, — дейилади баёнотда.
Маълумотларга кўра, 3 январга ўтар кечаси АҚШ қуролли кучлари Венесуэла ҳудудига зарбалар берган. Орадан бир неча соат ўтиб, АҚШ президенти Доналд Трамп Николас Мадуро ва унинг рафиқаси қўлга олингани ҳамда мамлакатдан олиб чиқилганини эълон қилган. У операция тафсилотларини матбуот анжуманида маълум қилишини билдирган.
АҚШ расмийлари Мадурони аввалроқ наркотрафик ва «наркотерроризм» билан боғлиқ жиноятларда айблаб, унинг қўлга олиниши учун мукофот эълон қилган эди.
Сўнгги йилларда Вашингтон Каракасга нисбатан сиёсий ва ҳарбий босимни кучайтириб келмоқда.
Венесуэла Ташқи ишлар вазирлиги АҚШ ҳаракатларини ҳарбий босқин сифатида баҳолаб, БМТга мурожаат қилишини маълум қилди. Мамлакатда фавқулодда ҳолат эълон қилинган. Расмий Каракас Мадуронинг ҳозирги жойлашуви ҳақида аниқ маълумот йўқлигини билдирган.
