2030 йилга бориб ўзбекистонликлар 50 та давлатга визасиз бориши мумкин

Ўзбекистон 2030 йилга келиб ўз фуқаролари учун визасиз саёҳат қилиш мумкин бўлган давлатлар сонини 50 тага етказишни режалаштирмоқда. Бу мақсадлар 2026–2030 йилларга мўлжалланган янгиланган ривожланиш стратегияси лойиҳасида белгиланган.

 

Ҳужжатга кўра, келгуси йилларда визасиз ва соддалаштирилган кириш режимига эга давлатлар билан ҳамкорлик изчил кенгайтирилади.

 

Хусусан, 2026 йилда яна икки давлат, 2027 йилда эса беш давлат билан визасиз ёки соддалаштирилган кириш тўғрисида битимлар тузиш режалаштирилган.

 

Натижада, визасиз ташриф буюриш мумкин бўлган мамлакатлар сони 2028 йилда 45 тага, 2029 йилда 48 тага, 2030-йилга келиб эса 50 тага етиши кутилмоқда.

 

Шу билан бирга, соддалаштирилган кириш тартиблари амал қиладиган мамлакатлар рўйхатини кенгайтириш ҳам кўзда тутилган. 2030 йилга келиб электрон виза, келишда виза ёки бошқа соддалаштирилган тартибларни таклиф қилувчи давлатлар сони 60 тага етиши режалаштирилмоқда.

 

Бундан ташқари, консуллик хизматлари учун мобил платформани ишга тушириш режалаштирилган. Рақамлаштириш натижасида ушбу хизматлардан фойдаланувчилар сони ҳозирги 8 500 нафардан 2026 йилда 15 минг нафарга, 2030 йилга келиб эса 100 минг нафарга етиши кутилмоқда.

 

Ташқи ишлар вазирлиги маълумотларига кўра, ҳозирда Ўзбекистон фуқаролари 35 та давлатга визасиз ташриф буюриши мумкин. Яна 42 та мамлакат соддалаштирилган кириш тартибларини таклиф этмоқда.