БМТ Хавфсизлик Кенгаши Венесуэла бўйича фавқулодда йиғилиш ўтказади
Халқаро ҳамжамият бу масалада икки позицияга бўлинган.
БМТ Хавфсизлик Кенгаши АҚШнинг Венесуэладаги ҳарбий операцияси юзасидан фавқулодда йиғилиш ўтказади. Бу ҳақда 24KZ ва Синхуа ахборот агентликлари хабар берди.
Маълум қилинишича, йиғилиш 5 январ — душанба куни, соат 10:00 да (Нью-Йорк вақти билан) бўлиб ўтади. Ҳозирда БМТ Хавфсизлик Кенгашига Сомали раислик қилмоқда. БМТдаги доимий ваколатхона вакили Хадиджа Аҳмаднинг айтишича, йиғилишнинг асосий ва ягона мавзуси АҚШнинг Венесуэладаги операцияси бўлади.
Хавфсизлик Кенгаши аъзолари Венесуэлада юзага келган вазият, тинч аҳоли хавфсизлиги ва халқаро ҳуқуқ нормаларига риоя этилиши масаласидан жиддий хавотир билдирмоқда.
Халқаро ҳамжамият мазкур воқеага нисбатан икки хил позицияни намоён қилмоқда. Айрим давлатлар АҚШ президенти Дональд Трамп қарорини қўллаб-қувватласа, бошқалар бу ҳаракатни Венесуэла суверенитетининг бузилиши сифатида баҳоламоқда.
