Нью-Йоркнинг янги мэри ишини Исроилга оид фармонларни бекор қилишдан бошлади

Нью-Йорк шаҳар мэри Зоҳран Мамдани лавозимга киришганидан сўнг илк фармонини имзолади. Шаҳар мэри девони томонидан эълон қилинган маълумотга кўра, ушбу фармон орқали собиқ мэр Эрик Адамс томонидан 2024 йил 26 сентябрдан бошлаб, яъни федерал коррупция айбловлари эълон қилинган кундан кейин чиқарилган барча ижро этувчи буйруқлар бекор қилинди.

 

Фармонда 2024 йил 26 сентябрда ёки ундан кейин чиқарилган ва 2025 йил 31 декабрдан кучга кирган барча фармонлар ўз кучини йўқотгани қайд этилган.

 

Мазкур қарор сўнгги ўн саккиз ой давомида Эрик Адамс томонидан қабул қилинган ўнга яқин фармонни бекор қилди. Улар орасида шаҳар ходимларига Исроилга қарши бойкотларда иштирок этишни тақиқлаш, иммиграция ходимларига қамоқхона текширувларини ўтказиш ваколатини бериш, от араваларини тақиқлаш ҳамда антисемитизмнинг ишчи таърифини белгилашга оид буйруқлар мавжуд.

 

Шу билан бирга, Мамдани яна бешта янги ижро этувчи фармонни имзолади. Уларнинг учтаси Нью-Йорк шаҳрида уй-жой шароитларини яхшилаш, ижарачиларнинг ҳуқуқларини ҳимоя қилиш ва кам таъминланган аҳоли учун уй-жой қурилишидаги бюрократик тўсиқларни камайтиришга қаратилган.

 

Янги мэр томонидан имзоланган сўнгги фармон жамоатчилик билан алоқалар учун масъул бўлган янги шаҳар департаментини ташкил этишни назарда тутади.

 

Маълумот учун, Зоҳран Мамдани ноябрь ойидаги сайловларда ғалаба қозониб, Нью-Йорк шаҳрининг илк мусулмон мэри сифатида тарихга кирди. У 34 ёшда бўлиб, тўрт йиллик муддат давомида лавозимда фаолият юритади.