Тошкентда ЙТҲ оқибатида аёл ҳалок бўлди
20 ёшли ҳайдовчи Lacetti русумли машинасида пиёдани уриб юборган.
2025 йил 31 декабр куни соат 21:00 лар атрофида Тошкент шаҳри Яшнобод тумани Маҳтумқули кўчасида йўл-транспорт ҳодисаси содир бўлди. Бу ҳақда Тошкент шаҳар ИИББ хабар берди.
Маълумотларга кўра, 2005 йилда туғилган Ж.Р. Lacetti русумли автомашинасини бошқариб кетаётган вақтда йўлнинг белгиланмаган жойидан кесиб ўтаётган 1991 йилда туғилган Й.Н. исмли пиёдани уриб юборган.
Йўл-транспорт ҳодисаси оқибатида пиёда олган тан жароҳатлари сабабли воқеа жойида вафот этган.
Мазкур ҳолат юзасидан Тошкент шаҳар Ички ишлар бош бошқармаси Тергов бошқармаси томонидан Ўзбекистон Республикаси Жиноят кодексининг 266-моддаси 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.
