2030 йилга келиб Ўзбекистонда аҳолининг 85 фоизи доимий ичимлик суви билан таъминланади

 

«Ўзбекистон–2030» стратегиясининг қайта кўриб чиқилган лойиҳасига кўра, 2030 йилга келиб мамлакат аҳолисининг 85 фоизи ичимлик суви хизматларидан доимий ва барқарор фойдаланиш имкониятига эга бўлиши режалаштирилмоқда. Ушбу мақсад шаҳарлар ва қишлоқ ҳудудларини тўлиқ қамраб олади.

 

Ҳужжатда қайд этилишича, ичимлик суви билан таъминлаш қамрови босқичма-босқич оширилади. Жумладан, 2026 йилда бу кўрсаткич 82 фоизга, 2027 йилда 83 фоизга, 2028 йилда 84 фоизга, 2029 йилда 84 фоизга ва 2030 йилга келиб 85 фоизга етказилиши белгиланган.

 

Асосий йўналишлардан бири сифатида Туямуюн сув омборини кенгайтириш назарда тутилмоқда. Унинг сиғимини қўшимча 1 миллиард куб метрга ошириш режалаштирилган бўлиб, бу 1,2 миллион гектар майдонда сув таъминотини яхшилаш ва ичимлик суви захирасини шакллантириш имконини беради.

 

Шу билан бирга, сувдан оқилона фойдаланиш бўйича чора-тадбирлар кучайтирилади. 2030 йилга келиб сувдан фойдаланиш самарадорлигини 25 фоизга ошириш, қишлоқ хўжалиги ерларининг 100 фоизини сувни тежовчи технологиялар билан жиҳозлаш режалаштирилган. Томчилатиб суғориш майдони 500 минг гектарга кенгайтирилади, ушбу технологияларни ишлаб чиқарувчи маҳаллий корхоналар қуввати эса йилига 300 минг гектарга етказилади.

 

Истеъмолни аниқ ҳисобга олиш мақсадида барча ичимлик суви истеъмолчиларини 100 фоиз ҳисоблагичлар билан таъминлаш кўзда тутилган.

 

Бундан ташқари, сув хўжалиги тизимидаги муаммоларни ҳал этиш режалаштирилмоқда. Хусусан, ер ости сувлари сатҳи муаммоли бўлган майдонлар 773,4 минг гектаргача қисқартирилади. Бетон қопламали магистраль ва хўжаликлараро каналларнинг узунлиги 13,1 минг километрга етказилиб, бу уларнинг умумий улушининг 46 фоизини ташкил этади. Давлат-хусусий шериклик асосида бошқариладиган сув хўжалиги иншоотлари сони эса 2000 тага етказилади.