Байден АҚШ собиқ президентлари орасида энг юқори пенсия олмоқда
У оладиган нафақаси собиқ президент Барак Обаманинг нафақасидан қарийб икки баравар кўп.
АҚШнинг собиқ президенти Жо Байден Оқ уй раҳбарлари орасида энг юқори давлат пенсиясига эга бўлди. Бу ҳақда The New York Post нашри хабар берди.
Нашр маълумотларига кўра, Байден йилига тахминан 417 минг доллар миқдорида нафақа олади. Бу кўрсаткич унинг президентлик давридаги йиллик маошидан ҳам юқори бўлиб, собиқ президент Барак Обаманинг нафақасидан қарийб икки баравар кўпдир.
Миллий солиқ тўловчилар жамғармаси вице-президенти Дамиан Бредининг таъкидлашича, Байденнинг узоқ йиллик сиёсий фаолияти унга бундай юқори нафақа тайинланишига сабаб бўлган. Унинг сўзларига кўра, Байден президентликдан кетганидан кейинги илк йил давомида бир вақтнинг ўзида икки давлат нафақа жамғармасидан тўлов олиш ҳуқуқига эга бўлган.
Аввалроқ Политисо нашри манбаларга таяниб, Байден нафақага чиққач, камтарона турмуш тарзини танлагани, ҳашаматли ҳаётдан тийилганини хабар қилган эди.
Шунингдек, май ойида журналистлар Жейк Таппер ва Алекс Томпсон муаллифлигидаги “Асл гуноҳ: Президент Байденнинг қулаши, унинг яшириниши ва яна номзодини қўйишдаги ҳалокатли қарори” номли китоб чоп этилди.
