Бойсунда нефть сизиб чиққанига Энергетика вазирлиги изоҳ берди
Маълум қилинишича, ҳозирда каналга оққан нефть суюқликларини тозалаш ишлари олиб борилмоқда.
Ижтимоий тармоқларда Сурхондарё вилояти Бойсун туманидаги М25 конига яқин ҳудудларда нефть сизиб чиққани акс этган видеолар тарқалмоқда. Ҳолат юзасидан Энергетика вазирлиги изоҳ берди.
Маълумотларга кўра, 2025 йил декабрь ойининг сўнгги кунларида Бойсун туманидаги «М-25» кони ҳудудида таркибида нефть сақловчи суюқлик (нефть суюқлиги) ер юзасига чиқиши қайд этилган.
Мазкур ҳолатни бартараф этиш ва экологик хавфсизликни таъминлаш мақсадида ҳудуд атрофида ҳамда сой ўзани бўйлаб қўшимча ҳимоя ҳовузлари барпо этилган. Йиғиб олинган нефть суюқлиги узлуксиз равишда махсус майдонга олиб чиқилмоқда, у ерда ҳажми 5 000 куб метр бўлган 2 та изоляцияланган шлам ҳовузи мавжуд бўлиб, нефть суюқлигини хавфсиз сақлаш ва кейинчалик самарали фойдаланиш имконини беради.
“Барча ишлар амалдаги саноат ва экологик хавфсизлик талабларига тўлиқ риоя қилган ҳолда олиб борилмоқда. Шунингдек, нефть суюқлиги намунаси бўйича таҳлил ишлари давом этмоқда, геологик тадқиқотлар ва каналга оқиб чиққан суюқликларни тозалаш ишлари олиб борилмоқда”, дейилади хабарда.
