Эрон бош раҳнамоси Москвага қочишга тайёрланмоқда — ОАВ
Хоманаийнинг Москвага қочиш режаси Башар ал-Ассаднинг ҳолати билан қиёсланмоқда.
Британиянинг The Sunday Times нашри Эрон бўйича разведка манбаларига таяниб хабар беришича, мамлакат Олий раҳбари Оятуллоҳ Али Хоманаий ички вазият кескинлашган тақдирда Теҳронни тарк этиш бўйича фавқулодда режа тайёрлаган.
Маълумотларга кўра, агар хавфсизлик кучлари норозилик намойишларини назорат остига ола олмаса ёки буйруқларга бўйсунишдан бош тортса, Хоманаий яқин оила аъзолари ва юқори лавозимли ёрдамчиларидан иборат кичик гуруҳ билан мамлакатдан чиқиб кетишга ҳозирлик кўрмоқда.
Разведка манбалари хабарига кўра, 86 ёшли Хоманаий тахминан 20 нафаргача бўлган шахслар билан, жумладан, унинг эҳтимолий вориси сифатида тилга олинаётган ўғли Можтаба Хоманаий ҳамроҳлигида ҳаракатланиши мумкин. Ушбу “Б режаси” армиянинг ёки хавфсизлик тузилмаларининг назоратни йўқотиши ҳолатида ишга туширилиши кўзда тутилган.
Нашр собиқ Исроил разведка ходими Бенни Сабатининг фикрини ҳам келтиради. Унга кўра, Хоманаий учун энг эҳтимолий қочиш йўналиши Москва ҳисобланади. Сабатининг таъкидлашича, Эрон Олий раҳбари Россия президенти Владимир Путинга нисбатан ижобий муносабатда бўлиб, Россияни нисбатан хавфсиз ва маданий жиҳатдан яқин давлат деб билади.
Манбаларга кўра, ушбу режа активлар, молиявий маблағлар ва мулкларни чет элга чиқариш чораларини ҳам ўз ичига олади. Бу ҳолат 2024 йил декабрь ойида Суриянинг собиқ президенти Башар ал-Ассаднинг Дамашқдан Москвага қочиши билан қиёсланмоқда.
