“Ҳудудимиз савдолашув мавзуси эмас” — Гренландия бош вазири

Гренландия бош вазири Йенс Фредерик Нильсен АҚШ президенти Дональд Трамп томонидан янграган аннексия ҳақидаги навбатдаги баёнотларга қатъий жавоб қайтарди. У Гренландия ҳукуматининг бундай босим ва ишораларни қабул қилмаслигини таъкидлаб, “Етар энди”, дея баёнот берди. Бош вазирнинг сўзларига кўра, Гренландия очиқ мулоқот тарафдори, бироқ бу жараён халқаро ҳуқуқ ва ўзаро ҳурмат асосида олиб борилиши шарт. Бу ҳақда Euronews хабар бермоқда.

 

Нильсен Facebook’даги саҳифасида АҚШ томонидан янграётган баёнотларни “аннексия ҳақидаги хомхаёллар” деб атади. У Гренландия на сотилишини, на босим остида қарор қабул қилишини билдирди. “Биз муҳокамага тайёрмиз, аммо бу фақат расмий каналлар орқали ва халқаро қонунларга амал қилган ҳолда бўлиши керак”, — деди у.

 

Трампнинг сўнгги чиқишлари АҚШнинг Венесуэлада амалга оширган ҳарбий амалиётидан сўнг янгради. Мазкур ҳолат Европа ва Арктика минтақасидаги давлатларда хавотир уйғотди. Трамп Гренландияни АҚШ миллий хавфсизлиги учун зарур ҳудуд деб атаб, Дания орол хавфсизлигини таъминлай олмаётганини иддао қилди.

 

Дания бош вазири Метте Фредериксен ҳам бу баёнотларга жавобан АҚШни тарихий иттифоқчига босим ўтказмасликка чақирди. Унинг таъкидлашича, Гренландия Дания Қироллиги таркибидаги автоном ҳудуд бўлиб, НАТО аъзоси ҳисобланади ва альянснинг хавфсизлик кафолатлари билан ҳимояланган. Европа Иттифоқи етакчилари ҳам ҳудудий яхлитлик ва суверенитет халқаро ҳуқуқнинг ажралмас тамойили эканини яна бир бор эслатди.

 

Шу билан бирга, Гренландия ҳукумати аҳолини ваҳимага тушмасликка чақирди. “Бизнинг келажагимиз ижтимоий тармоқлардаги постлар билан ҳал этилмайди”, — деди Нильсен. У Гренландия халқининг тақдири фақат ўша ерда яшовчи одамлар томонидан белгиланишини алоҳида урғулади.