Тошкентда криптоактивлар айланмаси ва гиёҳвандлик савдоси билан шуғулланган 3 нафар шахс қўлга олинди

 

Тошкент шаҳрида Telegram мессенжери орқали гиёҳвандлик воситалари савдоси билан шуғулланиб, криптоактивлар орқали йирик молиявий айланмани амалга оширган уч нафар шахс қўлга олиниб, қамоққа олинди. Бу ҳақда пойтахт ИИББ матбуот хизмати маълум қилди.

 

Қайд этилишича, Тошкент шаҳар ИИББнинг ахборот технологиялари соҳасидаги жиноятларга қарши курашиш бошқармаси томонидан ўтказилган тезкор тадбирлар давомида Телеграм платформасида ноқонуний гиёҳвандлик воситалари, уларнинг аналоглари ҳамда психотроп моддалар савдосига мўлжалланган махсус бот фаолияти фош этилган. Мазкур бот орқали криптоактивларни қабул қилиш, ўтказиш ва айирбошлаш ишлари ҳам амалга оширилгани аниқланган.

 

Тезкор-қидирув тадбирлари Юнусобод туманида олиб борилиб, натижада 1997 йилда туғилган А. ҳамда 2001 йилда туғилган Ш. ва Т. исмли шахслар қўлга олинган. Аниқланишича, мазкур шахслар ноқонуний Телеграм бот ва унга боғлиқ каналларни бевосита бошқариб келишган.

 

Тадбир давомида гумонланувчилардан 4 дона мобил телефон, 3 дона ноутбук, 12 дона турли банк пластик карталари, 11 дона SIM-карталар ҳамда қоғозларга ўралган гиёҳвандлик моддалари далилий ашё сифатида холислар иштирокида расмийлаштириб олинган.

 

Шунингдек, гумонланувчи А. ва Ш.нинг мобил қурилмалари кўздан кечирилганда, хорижий ва маҳаллий электрон криптоҳамёнлар орқали қарийб 95 мингта транзакция амалга оширилгани аниқланган. Ушбу операциялар умумий ҳисобда 2 миллион 375 минг АҚШ долларига тенг бўлган криптоактивлар айланмасини ташкил этган.

 

Бундан ташқари, тезкор тадбирлар давомида гумонланувчи A.нинг яшаш манзили кўздан кечирилганда, хонадондан 550 дона кучли таъсир қилувчи дори воситалари топилган.

 

Мазкур ҳолатлар юзасидан Ўзбекистон Республикаси Жиноят кодексининг 278-8-моддаси (криптоактивлар айланмаси соҳасидаги қонунчиликни бузиш), 243-моддаси (жиноий фаолиятдан олинган даромадларни легаллаштириш) ҳамда 251-1-моддаси билан жиноят иши қўзғатилиб, гумонланувчиларга нисбатан қамоққа олиш эҳтиёт чораси қўлланилган. Ҳозирда тергов ҳаракатлари давом этмоқда.