Хитой ижтимоий тармоқларида Тайван учун “Трамп сценарийси” муҳокама қилинмоқда

 

АҚШнинг Венесуэлада Николас Мадурога қарши ўтказган операцияси Хитой ижтимоий тармоқларида, хусусан Веибо платформасида кенг муҳокамаларга сабаб бўлди.

Мазкур мавзу қисқа вақт ичида энг оммабоп трендлар қаторига кириб, юз миллионлаб кўришлар қайд этилди.

 

Bloomberg нашрининг ёзишича, Weibo фойдаланувчилари АҚШнинг Венесуэладаги ҳаракатларини Хитой учун Тайван масаласида эҳтимолий намуна сифатида баҳоламоқда. Айрим фойдаланувчилар Вашингтоннинг қатъий чораларини Пекин томонидан Тайванга нисбатан қўлланиши мумкин бўлган ёндашув сифатида кўрсатишмоқда.

 

Изоҳларда Венесуэла ва Хитой томонидан ўз ҳудуди сифатида кўриладиган Тайван ўртасида маълум ўхшашликлар келтирилган. Баъзи фойдаланувчилар Тайванни мажбуран “қайтариб олиш” учун АҚШ Венесуэлада қўллаган услубдан фойдаланиш кераклигини очиқча илгари суришган.

 

“Келажакда Тайван билан бирлашиш жараёнида ҳам худди шундай ёндашув қўлланиши мумкин”, деб ёзган фойдаланувчилардан бири. Бошқа бир изоҳда эса: “Агар АҚШ халқаро ҳуқуқни эътиборсиз қолдираётган бўлса, нега биз унга амал қилишимиз керак?” деган фикр билдирилган.

 

Шунингдек, айрим изоҳларда Тайванга нисбатан кутилмаган ҳарбий операция ўтказилиши эҳтимоли ҳақида ҳам мулоҳазалар билдирилган. Бундай қарашлар муаллифлари АҚШнинг Венесуэладаги ҳаракатларини Тайван масаласини куч ишлатиш орқали ҳал этиш учун “идеал сценарий” сифатида таърифламоқда.