“Йўловчилар орасида мусобақага кетаётганлар ҳам бўлган”

Навоий вилояти Ички ишлар бошқармасининг расмий муносабатига кўра, ҳодиса «Навоий-Учқудуқ» халқаро аҳамиятга молик автомобиль йўлининг 167-168-километлари оралиғида юз берган.

 

 

Дастлабки суриштирувларга кўра, салонида 47 нафар йўловчиси бўлган автобусни «Зарафшон-Навоий» йўналиши бўйлаб бошқариб бораётган ҳайдовчи руль бошқарувини йўқотиб, йўналиши бўйича йўлнинг ўнг томонига чиқиб кетиб ағдарилган.

 

Ҳодиса оқибатида йўловчи сифатида кетаётган 2 нафар фуқаро олган тан жароҳатлари сабабли воқеа жойида вафот этган. Турли кўринишдаги тан жароҳатлари олган 9 нафар фуқаролар тиббиёт муассасаларига ётқизилган.

 

“Ҳозирда вазиятни тўлиқ ўрганиш, жабрланганлар ва уларнинг оила аъзоларига ёрдам кўрсатиш ҳамда оғир оқибатларга олиб келган шарт-шароитларга ҳуқуқий баҳо бериш мақсадида Навоий вилояти ИИБ томонидан воқеа тафсилотлари ўрганилмоқда”, дейилади расмий муносабатда.

 

Zamon.uz ҳолатни батафсилроқ ўрганиш мақсадида воқеа гувоҳлари билан телефон орқали мулоқот қилди. Уларнинг сўзларига кўра, автобус ичидаги йўловчилар спорт мусобақаси учун кетаётган бўлган. Воқеа чўл ҳудудида юз бергани учун ҳамда интернет алоқаси йўқлиги сабабли ҳодисага алоқадор шахслар билан боғланиш имконияти қийинлашган.

 

“Автобус бизнинг тумандан, Учқудуқ туманидан йўлга чиққан, ичида спорт мусобақасига кетаётган болалар бор эди. Болаларнинг ёшлари ҳар хил. Шу автобус ичида аммамнинг Тошкентда ўқийдиган ўғли ҳам бор эди. Менинг яқинларим яхши, аммамнинг ўғлининг қўли синган. Лекин икки нафар бола ўлганини айтишди”, дейди Zamon.uz билан гаплашган навоийлик фуқаро.

 

Zamon.uz ҳодиса тафсилотларини тўлиқроқ ўрганмоқда. Тез орада ҳодиса жойидан махсус репортажни эълон қиламиз.