АҚШ Гренландия устидан назоратни кучайтиришни режалаштирмоқда
Экспертлар фикрича, Вашингтоннинг Гренландияга нисбатан эҳтимолий ёндашуви Венесуэлада қўлланган усуллардан тубдан фарқ қилади.
АҚШ ҳукумати яқин ойларда Гренландия устидан назоратни ўрнатишга қаратилган сиёсий чораларни фаоллаштириши мумкин. Бу ҳақда Politico нашри хабар берди.
Қайд этилишича, мазкур ҳаракатлар АҚШда ноябрь ойида бўлиб ўтадиган оралиқ сайловлар ёки 4 июль — Америка мустақиллигининг 250 йиллиги арафасига тўғри келиши эҳтимолдан холи эмас.
Евросиё гуруҳи таҳлил марказининг Европа бўлими бошқарувчи директори Мужтаба Раҳмоннинг фикрига кўра, Вашингтоннинг Гренландияга нисбатан эҳтимолий ёндашуви Венесуэлада қўлланган усуллардан тубдан фарқ қилади.
Экспертнинг таъкидлашича, АҚШ мавжуд сиёсий мувозанатни ўзгартириш мақсадида кенг кўламли сиёсий таъсир кампаниясини ишга солиши мумкин. Жумладан, ҳарбий ва фуқаролик назоратини кучайтириш йўлида маҳаллий сиёсатчилар билан алоқаларни мустаҳкамлашга уринишлар эҳтимоли ҳам истисно этилмайди.
Аввалроқ АҚШ президенти Доналд Трамп Гренландияни Қўшма Штатлар учун миллий хавфсизлик нуқтаи назаридан муҳим ҳудуд сифатида баҳолаган эди.
Ўз навбатида, Дания Бош вазири Метте Фредериксен Гренландия қиролликнинг ажралмас қисми эканини таъкидлаб, АҚШни босим ўтказишдан тийилишга чақди ҳамда орол устидан назорат ўрнатиш уринишлари асоссиз эканини билдирди.
