Мадуронинг рафиқаси ҳибсга олиш вақтида оғир жароҳат олган — СNN

 

Венесуэла президенти Николас Мадуронинг рафиқаси Силия Флорес АҚШ кучлари томонидан қўлга олинган пайтда оғир тан жароҳатлари олган. Бу ҳақда 5 январ куни Нью-Ёркда бўлиб ўтган суд мажлисида унинг адвокати Марк Доннеллига таяниб СNN хабар берди.

 

Суд мажлисида Флорес пешонасига бинт боғланган ва ўнг кўзи остида катта кўкаришлар билан иштирок этган. Шунингдек, у ўрнидан туришда суд ижрочисининг ёрдами билан ҳаракатланган.

 

Адвокат Марк Доннеллининг таъкидлашича, Силия Флорес “қўлга олиш жараёнида зўравонликка учраган” ва қовурғалари синган ёки жиддий кўкарган бўлиши мумкин. Унинг айтишича, Флорес тиббий кўрикдан ўтказилиши лозим.

 

Шу билан бирга, суд мажлисида Николас Мадуро ўзига қўйилган айбловларни тан олмади ҳамда ўзини ҳануз Венесуэла президенти деб ҳисоблашини билдирди. Адвокатлар, шунингдек, Мадуронинг соғлиғи билан боғлиқ муаммолар борлигини ҳам қайд этишди.

 

Маълумотларга кўра, Николас Мадуро 3 январдан буён Бруклиндаги ҳибсхонада сақланмоқда. У ерда илгари репер П. Дидди ҳамда Жеффри Эпштейн иши билан боғлиқ шахс — Гислен Максвелл ҳам бўлган.

 

Эслатиб ўтамиз, 3 январ куни АҚШ Венесуэлада ҳарбий операция бошлаб, Николас Мадуро ва унинг рафиқасини қўлга олган ва АҚШ ҳудудига олиб кетган. 5 январ куни кечқурун Мадуронинг иши бўйича Нью-Ёркда дастлабки суд мажлиси бўлиб ўтди. Кейинги суд мажлиси 17 мартга белгиланган.