Ўзбекистонда улушли қурилишда қоидабузарликлар учун жиноий жавобгарлик жорий этиш режалаштирилмоқда

 

Ўзбекистонда улушли қурилиш соҳасида назоратни кучайтириш ҳамда ушбу йўналишдаги қоидабузарликлар учун жиноий жавобгарлик жорий этиш режалаштирилмоқда. Қоидабузарлар 247 миллион сўмгача жарима ёки озодликдан маҳрум этилиши мумкин.

 

Адлия вазирлиги маълумотига кўра, ишлаб чиқилган қонун лойиҳаси улушли қурилиш соҳасини тартибга солишни кучайтириш ҳамда депозит ҳисобварақларини жорий этишга қаратилган.

 

Хусусан, Жиноят кодексини 188-2-модда билан тўлдириш таклиф этилмоқда. Ушбу модда кўчмас мулк ҳуқуқлари давлат реестрида рўйхатдан ўтказилмаган ҳолда улушли иштирок шартномаларини тузиш каби ноқонуний равишда маблағ жалб қилиш ҳолатларини назарда тутади.

 

Биринчи марта содир этилган қоидабузарлик учун 123,6 миллион сўмдан 164,8 миллион сўмгача жарима, 1 йилдан 3 йилгача озодликни чеклаш ёки қамоқ жазоси белгиланиши мумкин. Такроран содир этилган, гуруҳ бўлиб амалга оширилган ёки катта миқдорда зарар етказилган ҳолатлар учун 164,8 миллион сўмдан 247,2 миллион сўмгача жарима, 3 йилдан 5 йилгача озодликни чеклаш ёки қамоқ жазоси ҳамда муайян ҳуқуқлардан маҳрум этиш назарда тутилмоқда.

 

Агар етказилган зарар жуда катта миқдорда деб топилса, ҳуқуқбузар 5 йилдан 7 йилгача озодликдан маҳрум қилиниши мумкин. Худди шундай жазо уюшган гуруҳ томонидан ёки унинг манфаатларини кўзлаб содир этилган ҳаракатлар учун ҳам қўлланилади.

 

Шу билан бирга, қонун лойиҳасида қоидабузарликни биринчи марта содир этган шахсларни, аниқланган кундан бошлаб 30 кун ичида етказилган зарарни тўлиқ қоплаган тақдирда, жавобгарликдан озод қилиш таклиф қилинмоқда.

 

Бундан ташқари, махсус ваколатли органларга маъмурий жазо чораларини қўллаш ҳуқуқи берилиши режалаштирилган. Жумладан, Ягона уй-жой қурилиши ахборот тизимига маълумот жойлаштирмаган мансабдор шахсларга 28,84 миллион сўм миқдорида жарима солинади. Лойиҳа ҳужжатларига ноқонуний ўзгартиришлар киритиш эса 41,2 миллион сўмгача жаримага сабаб бўлади.