Ўзбекистонликлар яна 2 та қўшни давлатга ID-карта орқали саёҳат қилиши мумкин

 

Келгуси икки йилда Ўзбекистон яна иккита қўшни мамлакат билан чегарадан ўтиш мумкин. Бу ҳақда жамоатчилик муҳокамасига қўйилган янгиланган Ўзбекистон-2030 стратегияси лойиҳасида сўз боради. 

 

Унда камида 3 та давлат билан фуқароларининг чегаралардан ID-карталари асосида эркин ўтиши ни таъминлашга эришиш вазифаси белгиланган. Бу тартиб 2026 йилда 2 та давлат билан, 2027 йилда эса 3 та давлат билан амалга оширилиши кўзда тутилган.

 

Ташқи ишлар вазирлиги матбуот котиби Аҳрор Бурхоновнинг Zamon.uz'га маълум қилишича, Марказий Осиё мамлакатлари бўйича ушбу имконият Қирғизистон билан биргаликда учтага етказилади.

 

“Ҳозирда қўшни мамлакатларимиз билан бу борада музокаралар олиб борилмоқда”, — деди Бурхонов.

 

У қайси мамлакатлар билан музокаралар олиб борилаётганлигига очиқлик киритмади.  

 

Маълумот учун, Ўзбекистон 2023 йил сентябрда Қирғизистон билан божхона чегара постида хорижга чиқиш паспортисиз фақатгина ID-карталар орқали кесиб ўтиш ва у ерда 30 кунгача визасиз бўлиш имконияти йўлга қўйилган эди.

 

Эслатиб ўтамиз, 2024 йил август ойида Марказий Осиё мамлакатлари раҳбарларининг олтинчи Маслаҳат учрашувида Шавкат Мирзиёев Марказий Осиёда ID-карталарни ўзаро тан олишни таклиф қилган эди. Ундан сўнг ташқи сиёсат бўйича маслаҳатчиси Абдулазиз Комилов Қозоғистон билан бу тартибни жорий этишни муҳокама қилинаётганини маълум қилган эди.