АҚШ Гренландияни эгалласа НАТО парчаланади — Дания Бош вазири

 

Дания Бош вазири Метте Фредериксен АҚШнинг Гренландия устидан назорат ўрнатишга уринишлари НАТО иттифоқининг барбод бўлишига олиб келиши мумкинлиги ҳақида огоҳлантирди. Бу ҳақда RTVI хабар берди.

 

У Даниянинг ТV2 телеканалига берган интервьюсида, агар Қўшма Штатлар Даниянинг автоном ҳудуди ҳисобланган Гренландияга нисбатан ҳарбий ҳаракатларга қўл урса, бу НАТО учун ҳалокатли оқибатларга сабаб бўлишини таъкидлади.

 

“Агар Қўшма Штатлар бошқа НАТО аъзосига ҳарбий ҳужум қилишга қарор қилса, унда ҳаммаси якунланади — нафақат альянснинг ўзи, балки Иккинчи жаҳон урушидан буён таъминлаб келинаётган умумий хавфсизлик тизими ҳам”, — деди Фредериксен.

 

Бош вазир Дания ҳукумати эҳтимолий ҳужумнинг олдини олиш учун барча чораларни кўраётганини билдириб, АҚШни “қабул қилиб бўлмайдиган босим”да айблади ва бу ҳолатни “халқаро ҳамжамиятга қарши асоссиз ҳужум” деб баҳолади.

 

Мазкур баёнот АҚШ президенти Доналд Трампнинг Гренландия бўйича сўнгги таҳдидлари фонида янгради. Bloomberg агентлиги қайд этишича, Фредериксен жорий йилда сайловлар олдидан жамоатчилик томонидан аниқ ҳаракатлар режасини тақдим этиш борасида кучайиб бораётган босим остида қолмоқда.

 

4 январь куни АҚШ президенти Доналд Трамп Гренландия Қўшма Штатлар учун “жуда зарур” эканини билдириб, мазкур масалани қисқа муддат ичида қайта кўриб чиқишини айтган. У ҳудуд устидан назорат ўрнатиш учун ҳарбий куч ишлатиш эҳтимолини ҳам истисно этмади.

 

Bloomberg таҳлилчиларига кўра, бундай баёнотлар Европа ва НАТО учун узоқ муддатли сиёсий ва ҳарбий оқибатларга олиб келиши мумкин.