Эрон 80 миллион фуқарога ойлик тўловлар жорий этилишини маълум қилди

 

Эрон расмийлари мамлакатда кучайиб бораётган иқтисодий инқироз ва оммавий норозилик намойишлари фонида аҳолига янги ойлик пул тўловлари дастури жорий этилишини эълон қилди. Ҳукумат мазкур чора орқали ижтимоий кескинликни юмшатишни мақсад қилган.

 

Inbusiness.kz нашри Bloomberg агентлигига таяниб хабар беришича, Эрон Меҳнат вазири ушбу тўловлар тахминан 80 миллион кишини, яъни деярли бутун мамлакат аҳолисини қамраб олишини маълум қилган. Дастур доирасида фуқароларга ойига тахминан етти доллар миқдорида маблағ ажратилиши режалаштирилмоқда.

 

Қайд этилишича, мазкур қарор халқаро санкциялар сабаб иқтисодий вазиятнинг кескин ёмонлашуви, шунингдек, нефть экспортидан тушадиган даромадларнинг камайиши шароитида қабул қилинган.

 

Bloomberg маълумотларига кўра, Эрон иқтисодиёти жиддий босим остида қолмоқда: миллий валюта қийматининг ярмидан кўпини йўқотган, йиллик ўртача инфляция даражаси эса 42,2 фоизга етган. Асосий товарлар ва хизматлар нархининг ошиши миллионлаб оилаларнинг турмуш даражасига салбий таъсир кўрсатиб, норозилик кайфиятининг кучайишига сабаб бўлган.

 

Тўловлар дастури кенг кўламли норозилик намойишлари давом этаётган бир пайтда эълон қилинди. Инсон ҳуқуқлари фаолларининг маълумотларига кўра, намойишлар мамлакат бўйлаб 78 та шаҳар ва 222 та аҳоли пунктини қамраб олган. Айрим намойишчилар очиқчасига Олий раҳбар Али Хоманаий бошчилигидаги режимнинг истеъфосини талаб қилмоқда.

 

Шу билан бирга, вазият куч ишлатиш чораларининг кучайиши билан кечмоқда. Инсон ҳуқуқлари ташкилотлари маълумотига кўра, норозилик намойишлари чоғида камида 35 киши, жумладан, уч нафар бола ҳалок бўлган, мингга яқин фуқаро ҳибсга олинган. Ушбу ҳолатлар Эрон атрофидаги халқаро хавотирни янада кучайтирмоқда.