Фарғонада ўқитувчиларни 24 соатлик навбатчиликка жалб қилган мактаб директори ишдан олинди
Ўқитувчилар кеча-кундуз навбатчиликда туришга мажбурлаган.
Фарғона вилояти Бувайда туманидаги 37-умумтаълим мактабида ўқитувчиларни мажбурий 24 соатлик навбатчиликка жалб қилган мактаб директори лавозимидан озод этилди. Бу ҳақда вилоят Мактабгача ва мактаб таълими бошқармаси матбуот хизмати хабар берди.
Маълум қилинишича, мактаб ўқитувчилари 2025 йил 25 декабрдан 6 январгача “мактабда тинчлик ва тартибни таъминлаш, ходимларнинг хавфсизлиги ва соғлиғини назорат қилиш” баҳонасида навбатчиликка қўйилган. Ҳатто расмий беш кунлик таътил даврида ҳам педагоглар мактаб ҳудудида қолишга ва икки сменада навбатчилик қилишга мажбур бўлган.
Маълумотларга кўра, мактаб директори вазифасини бажарувчи X.Н. педагог ходимларга уларнинг лавозим йўриқномаларида назарда тутилмаган мажбуриятларни юклаган. У ўқитувчилардан кеча-кундуз навбатчиликни талаб қилиб, амалдаги меъёрий ҳужжатлар ва тартибларни бузган.
Мазкур ҳолат юзасидан 6 январь куни чиқарилган буйруқ билан X.Н. эгаллаб турган лавозимидан озод этилган. Шунингдек, тизимдаги масъул раҳбарларга бундай ҳолатларга йўл қўйилмаслиги юзасидан огоҳлантириш берилган.
