Humans иши бўйича ўтказилган текширув ҳужжатлари ИИББга тақдим этилди — Марказий банк
Жабрланувчилардан яна мурожаат қилишлари сўралмоқда.
2025 йил 9 декабрь куни ижтимоий тармоқларда Humans иловасига уланган банк карталаридан фойдаланувчилар рухсатисиз пуллар ечиб олингани ҳақида хабарлар тарқалди. Ўшанда Марказий банк ҳодисани расман тасдиқлаб, текширув ишлари бошланганини эълон қилганди. Ҳолат бўйича Zamon.uz ўрганиш олиб борган эди.
Марказий банкнинг маълум қилишича, Humans МЧЖ компанияси билан боғлиқ ҳолат тўлиқ текширилган ва йиғилган маълумотлар ички ишлар идораларига топширилган.
Текширув Octogram АЖ тўлов ташкилотида, Ҳуманс МЧЖ компаниясига тўлов хизматларини тақдим этган ҳолда, Марказий банк фармойишига биноан ишчи гуруҳ томонидан амалга оширилди. Текширув натижалари бўйича тузилган маълумотнома Тошкент шаҳар Ички ишлар бош бошқармасига ҳуқуқий баҳо бериш ва ўз ваколати доирасида чоралар кўриш учун тақдим этилди.
Айни пайтда Humans компанияси билан боғлиқ ҳолат Тошкент шаҳар Ички ишлар бош бошқармаси томонидан қонунчиликда белгиланган тартибда ўрганилмоқда. Фуқаролардан мазкур ҳолат бўйича ҳуқуқни муҳофаза қилувчи органларга мурожаат қилишлари сўралади.
