Ўзбекистонда 2026 йил учун иш вақти календари эълон қилинди
Камбағалликни қисқартириш ва бандлик вазирлиги тайёрлаган ҳужжатда байрам ва байрамолди кунларида амал қиладиган иш вақти меъёрлари алоҳида кўрсатиб ўтилган.
Камбағалликни қисқартириш ва бандлик вазирлиги 2026 йилга мўлжалланган иш вақти календарини ишлаб чиқди. Бу ҳақда вазирлик матбуот хизмати маълум қилди. Календарь Меҳнат кодекси нормалари ҳамда Президентнинг расмий байрамлар ва қўшимча дам олиш кунларига оид фармони асосида тайёрланган.
Янги ҳужжатда 5 кунлик (40 соатлик), 6 кунлик (40 соатлик) ва 6 кунлик (36 соатлик) иш ҳафталари учун ойлар, чораклар, ярим йил ва йил кесимида иш кунлари ҳамда иш соатлари сони ҳисоблаб чиқилган. Шунингдек, байрам ва байрамолди кунларида амал қиладиган иш вақти меъёрлари алоҳида кўрсатиб ўтилган.
Мазкур иш вақти календаридан ташкилот ва корхоналарда иш графикларини тузиш, ходимлар таътилини режалаштириш, шунингдек, ойлик ва йиллик иш соатларини аниқлашда фойдаланиш мумкин. Ҳужжат меҳнат жараёнларини аниқ ва тизимли ташкил этишга хизмат қилади.
Агар йил давомида Президент фармони билан қўшимча дам олиш кунлари белгиланса ёки мавжуд дам олиш кунлари кўчирилса, иш вақти календарига тегишли ўзгартиришлар киритилиши қайд этилди. Аввалроқ байрам кунларига доир дам олиш тартиби бўйича фармон имзолангани ҳақида хабар берилган эди.
