Ўзбекистонда қарийб 20 минг фуқарони Умрага ноқонуний юборган шахслар қўлга олинди
2024–2025 йиллар давомида фуқаролардан нақд пул кўринишида жами 22,8 миллион доллар ундирилган.
Ўзбекистонда қарийб 20 минг нафар фуқарони Умра зиёратига ноқонуний равишда юбориш билан шуғулланган ташкилот фаолияти фош этилди ва тўхтатилди.
Ички ишлар вазирлиги маълумотига кўра, мазкур схема “Jalolquduq Aviatrans” компанияси ниқоби остида фаолият юритган норасмий туризм бизнеси томонидан амалга оширилган.
Аниқланишича, Андижон вилоятидан бўлган 41 ёшли аёл ноқонуний саёҳатларни ташкил этишда муҳим роль ўйнаган. У ўзини норасмий сайёҳлик агенти сифатида таништириб, 19 500 нафар фуқарони ноқонуний Умра сафарларига жалб қилган.
2024–2025 йиллар давомида фуқаролардан нақд пул кўринишида жами 22,8 миллион доллар ундирилган. Ҳуқуқни муҳофаза қилувчи органларнинг ҳисоб-китобларига кўра, давлат ва жамоат манфаатларига етказилган зарар 1,8 миллиард сўмдан ошган. Шунингдек, 15,3 миллиард сўмдан ортиқ солиқ ва бошқа мажбурий тўловларни тўлашдан бўйин товлаш ҳолатлари аниқланган.
Ноқонуний фаолият оқибатида зиёратчиларнинг ўзлари ҳам жиддий муаммоларга дуч келган. Хабарга кўра, 534 нафар фуқаро Саудия Арабистонига юборилган бўлиб, у ерда оғир аҳволга тушиб қолган ва етарли турар жой билан таъминланмаган. Уларнинг барчаси кейинчалик махсус рейслар орқали Ўзбекистонга қайтарилган.
Мазкур ҳолат юзасидан жиноят иши қўзғатилди. Жами 14 нафар шахсга айблов эълон қилинган, улардан 13 нафари ҳибсга олинган. Ҳозирда тергов ҳаракатлари давом эттирилмоқда.
