Россия АҚШ таъқиб қилган танкерни кузатиш учун сувости кемаси юборди
Москва АҚШ томонидан тўхтатилган Marinera танкери атрофидаги вазиятни диққат билан кузатаётганини маълум қилди.
The Wall Street Journal АҚШ расмийларига таяниб хабар беришича, Россия Венесуэла яқинида АҚШ томонидан таъқиб остига олинган нефть танкерини кузатиш мақсадида сувости кемасини юборган. Гап аввал Bella 1 номи билан танилган, ҳозирда эса Marinera деб аталадиган танкер ҳақида бормоқда.
Нашр маълумотига кўра, АҚШ ушбу кемани Венесуэла атрофида санкциялар остидаги нефть ташишига қарши жорий қилинган чекловларни четлаб ўтишга уринишда гумон қилган. Бироқ танкер Венесуэлада тўхтаб, нефть юклай олмаган ва натижада бўш ҳолда қолган. Шунга қарамай, АҚШ Соҳил қўриқлаш хизмати уни Атлантика океанида кузатишда давом этган.
WSJ ёзишича, Marinera ҳозирда Исландиядан тахминан 450 километр жанубда жойлашган бўлиб, Шимолий денгиз томонга ҳаракатланмоқда. Шу билан бирга, АҚШ Қуролли кучлари Европа қўмондонлиги Шимолий Атлантика ҳудудида танкер АҚШ федераль суди чиқарган ордер асосида тўхтатилганини тасдиқлаган.
Россия Ташқи ишлар вазирлиги эса АҚШ томонидан қўлга олинган Россия кемаси билан боғлиқ вазият Москва томонидан синчковлик билан кузатилмоқда деб маълум қилди. Расмий баёнотда ҳодиса юзасидан дипломатик ва ҳуқуқий баҳо берилиши мумкинлиги истисно этилмади.
