2025 йилда Тошкент вилояти божхона бошқармаси томонидан 195,3 кг гиёҳвандлик воситаларининг ноқонуний айланмасига чек қўйилди

 

Тошкент вилояти божхона бошқармаси томонидан 2025 йил давомида жами 17,3 трлн сўмлик божхона тўловлари ҳисобланди. Бу ҳақда Бошқарма матбуот хизмати хабар қилмоқда. 

 

Шундан тадбиркорлик субъектларини қўллаб-қувватлаш мақсадида 8 трлн сўмлик божхона имтиёзлари тақдим этилди, қолган 9,3 трлн сўм давлат бюджетига йўналтирилди.

Имтиёз қўлланилган асосий товарлар қаторига транспорт воситалари ва уларнинг эҳтиёт қисмлари, технологик асбоб-ускуналар, озиқ-овқат маҳсулотлари ҳамда металл хом ашёлари киради.

Ҳисобот даврида 2,4 млрд АҚШ долларидан ортиқ қийматдаги товарлар хорижий бозорларга экспорт қилинди. Асосий савдо ҳамкорларимиз Қозоғистон, Хитой, Россия, Туркия, Афғонистон, Тожикистон ва Қирғизистон давлатлари бўлди.

Бошқарма томонидан божхона қонунчилиги бузилишларининг олдини олиш, уларни аниқлаш ва чек қўйиш, контрабандага қарши курашиш бўйича тизимли ишлар амалга оширилди. Ҳуқуқни муҳофаза қилувчи органлар билан ҳамкорликда гиёҳванд воситаларининг ноқонуний муомаласига қарши кураш доирасида 59 та ҳолатда жами 195,3 кг гиёҳвандлик воситаларининг ноқонуний айланмасига чек қўйилди.

Яширин иқтисодиётга қарши курашиш доирасида 129 млрд 263 млн сўмлик товар-моддий бойликларнинг ноқонуний айланмаси фош этилди. Шунингдек, акциз маркаси билан маркаланмаган 96 та ҳолатда қиймати 2,6 млрд сўм бўлган 74 099 қути тамаки маҳсулотларининг ноқонуний айланмасига чек қўйилди.

Аниқланган ҳуқуқбузарликлар бўйича 49,6 млрд сўм қўшимча божхона тўловлари ҳисобланди.

Аҳоли саломатлигини муҳофаза қилиш мақсадида 891 кгдан ортиқ кучли таъсир қилувчи моддалар ноқонуний айланмасига чек қўйилган.

Мамлакатимизда тадбиркорлик субъектларига яратилаётган қулай шарт-шароитлар иқтисодиётимиз ривожига хизмат қилмоқда. Божхона органлари томонидан ташқи иқтисодий фаолиятни доимий қўллаб-қувватлаш, тадбиркорлар дуч келаётган тўсиқларни бартараф этиш бўйича тизимли чора-тадбирлар амалга оширилмоқда.

Жумладан, 2025 йилда Тошкент вилояти ҳудудидаги 72 та тадбиркорлик субъекти томонидан қиймати 270 млн АҚШ долларига тенг бўлган 762,5 минг тонна хом ашё “божхона ҳудудида қайта ишлаш” режимига жойлаштирилди. Қайта ишлангандан сўнг қиймати 246,2 млн АҚШ доллари ва оғирлиги 420,6 минг тоннани ташкил этган тайёр маҳсулотлар экспорт қилинди.