АҚШ Венесуэла нефтини назорат остига олади, Хитойга экспорт тўхтатилди

 

АҚШ Венесуэланинг денгиз блокадасини бекор қилиш, бироқ мамлакатнинг нефть экспорти устидан тўлиқ назорат ўрнатмоқчи. Бу ҳақда АҚШ энергетика вазири Крис Райт 7 январь куни Goldman Sachs энергетика конференциясида маълум қилди.

 

Унинг сўзларига кўра, Венесуэла нефтини сотиш жараёни АҚШ ҳукумати томонидан амалга оширилади, савдодан тушган маблағлар эса Вашингтон назоратидаги махсус ҳисоб-рақамларга йўналтирилади. Кейинчалик ушбу маблағлар Венесуэла иқтисодиётини тиклаш мақсадида ишлатилиши режалаштирилган.

 

Дастлаб Венесуэла омборларида сақланаётган нефть, кейинчалик эса номаълум муддат давомида мамлакатда ишлаб чиқариладиган хом нефть сотилиши кўзда тутилмоқда. АҚШ президенти Доналд Трамп илгари Венесуэла АҚШга 30–50 миллион баррель нефть етказиб беришини билдирган. Унинг таъкидлашича, савдо бозор нархларида амалга оширилади ва тушум “икки мамлакат халқи манфаатлари учун” сарфланади.

 

Bloomberg агентлигининг хабар беришича, маблағларни АҚШ Ғазначилиги ҳисобларида сақлаш уларни Венесуэла кредиторларидан ҳимоя қилиш имконини беради. Шунингдек, АҚШ маъмурияти Венесуэлага нисбатан санкцияларни босқичма-босқич юмшатиш масаласини кўриб чиқмоқда.

 

Трамп маъмурияти Венесуэла нефть саноатини тиклаш жараёнига Chevron, ExxonMobil вa ConocoPhillips каби Америка компанияларини жалб этиш ниятида. Мутахассислар баҳосига кўра, Венесуэла энергетика секторини тиклаш учун 100–200 миллиард долларгача инвестиция талаб этилади.

 

Мазкур хабарлар фонида 7 январь куни жаҳон бозорларида нефть нархлари пасайди: Брент нефти 1,3 фоизга тушиб, баррелига 60 доллардан пастлади, WTI эса 2 фоизга арзонлаб, 56 долларни ташкил этди.

 

Шу билан бирга, Reuters маълумотига кўра, Венесуэла сўнгги беш кун давомида Хитойга нефть етказиб бермаган, АҚШга экспорт эса Chevron орқали давом этмоқда.

 

Ўтган ой, инқироздан олдин, мамлакат Хитойга кунига тахминан 700 минг баррель ва Қўшма Штатларга кунига 150 минг баррель нефть етказиб берган эди.