АҚШда иммиграция ходими аёлни отиб ўлдирди

 

АҚШнинг Миннесота штати, Миннеаполис шаҳрида Иммиграция ва божхона назорати (ICE) ходими томонидан аёл отиб ўлдирилди. Бу ҳақда Associated Press (AP) агентлиги хабар берди.

 

Маълумотларга кўра, ҳодиса йўл ўртасида тўхтаб қолган SUV автомобили атрофида содир бўлган. Кузатув камераларида ICE ходимлари транспорт воситасига яқинлашгани, ходимлардан бири эшикни очишни талаб қилиб, тутқични ушлагани акс этган. Автомобиль олдинга ҳаракатлана бошлаган пайтда, унинг олдида турган ICE ходими қуролидан камида икки марта ўқ узган. Оқибатда автомобилни бошқариб келаётган аёл ҳалок бўлган. CBS телеканали маълумотига кўра, ҳалок бўлган аёл АҚШ фуқароси бўлган.

 

Ҳодиса юзасидан Миннеаполис мери Жейкоб Фрей ICE'ни шаҳарни тарк этишга чақирди. Унинг таъкидлашича, агентлик содир бўлган воқеани “ўзини ҳимоя қилиш” сифатида кўрсатишга уринмоқда, бироқ бу изоҳни у «асоссиз» деб баҳолаган.

 

АҚШ Ички хавфсизлик вазири Кристи Ноэм эса аёл ICE ходимларини автомобиль билан босиб ўтишга уринганини, ҳаттоки улардан бирига зарба берганини маълум қилди. АҚШ президенти Доналд Трамп ҳам воқеани шарҳлар экан, аёл ICE ходимига “қасддан ва зўравонлик билан” қаршилик кўрсатганини айтди.

 

Шунингдек, Доналд Трамп Truth Social платформасида эълон қилган баёнотида отишма “ўзини ҳимоя қилиш” доирасида содир бўлганини билдириб, ICE ходимларини тўлиқ қўллаб-қувватлашини таъкидлади. Президент воқеа учун “радикал чап қанот”ни айблаган.