Метан заправкалар фаолиятига яна чеклов жорий этилди
Фарғона водийсида метан заправкаларнинг иш вақти газ босими даражасидан келиб чиқиб белгиланади.
Магистраль газ қувурларида босим пасайиши кузатилаётгани муносабати билан табиий газдан оқилона фойдаланиш ҳамда аҳоли ва ижтимоий соҳа объектларини барқарор таъминлаш мақсадида бир қатор зарур чоралар кўрилмоқда. Бу ҳақда Энергетика вазирлиги маълум қилди.
Хусусан, биринчи навбатда аҳоли хонадонлари, жамоат транспорти ҳамда ижтимоий соҳа объектларини табиий газ билан узлуксиз таъминлаш устувор вазифа этиб белгиланган. Шу боис, маҳаллий ҳокимликлар билан келишилган режа-графикларга асосан метан заправкалар фаолиятига вақтинчалик чекловлар киритилмоқда.
Маълум қилинишича, бугун, 8 январдан бошлаб метан заправкалар соат 10:00 дан 16:00 га қадар фаолият юритади.
Фарғона водийсида метан заправкаларнинг иш вақти газ босими даражасидан келиб чиқиб, маҳаллий ҳокимликлар билан келишилган ҳолда белгиланади.
