Ўзбекистонда бир ойда эҳтиёжманд оилаларга 1,2 триллион сўм компенсация ажратилди

 

Ўзбекистонда эҳтиёжманд оилаларни қўллаб-қувватлаш доирасида бир ойда 1,2 триллион сўм бир марталик моддий ёрдам тўлаб берилди. Бу ҳақда Ижтимоий ҳимоя миллий агентлиги маълум қилди.

 

Қайд этилишича, эҳтиёжманд оилаларга электр энергияси ва табиий газ истеъмоли бўйича базавий меъёрдан ортиқ фойдаланилган қисми учун компенсация тўлаб берилмоқда. Жумладан, электр энергияси бўйича ойига базавий меъёрдан ортиқ 150 кВт/соатгача, табиий газ бўйича эса иситиш мавсумида 250 куб метр, иситиш мавсумидан ташқари даврда 150 куб метргача бўлган ортиқча истеъмол учун базавий ва оширилган тарифлар ўртасидаги фарқ қопланади.

 

Маълумотларга кўра, 2025 йил 1 майдан буён базавий меъёрдан ортиқ энергия истеъмол қилган 562,9 минг нафар эҳтиёжманд оилага жами 41,6 миллиард сўм компенсация тўлаб берилган. Шундан 30 миллиард сўм электр энергияси, 11,6 миллиард сўм эса табиий газ учун ажратилган.

 

Шунингдек, ўтган йилнинг ноябрь ойида 1 миллион 161 мингдан ортиқ эҳтиёжманд оилага 1,2 триллион сўм миқдорида бир марталик моддий ёрдам молиялаштирилгани қайд этилди.

 

Аввалроқ, қайси оилалар “камбағал оила” тоифасига киритилиши ҳақида маълумот берилганди. Таъкидланишича, 2026 йил 1 февралдан “Ижтимоий ҳимоя ягона реестри” ҳамда Камбағал оилалар реестри негизида ягона Ижтимоий реестр жорий этилади.